ვალდორფის პედაგოგიკას 100 წლიანი ისტორია აქვს. პირველი ვალდორფის სკოლა 1919 წელს გერმანიაში, ქალაქ შტუტგარტში, რუდოლფ შტაინერისა და სიგარეტების ფაბრიკის, „ვალდორფ ასტორიას“ მფლობელის, ემილ მოლტის ინიციატივით დაარსდა, ფაბრიკის თანამშრომლების შვილებისათვის. მოგვიანებით, 1926 წელს სკოლასთან არსებული პირველი ვალდორფის ბაღი გაიხსნა.
1994 წელს დაარსდა თბილისის თავისუფალი ვალდორფის სკოლა და ბაღიც სკოლას შეუერთდა, ეს იყო ბაღის არსებობისთვის მნიშვნელოვანი გადაწყვეტილება. რადგან ყოველდღიურად იზრდებოდა ვალდორფის პედაგოგიკით დაინტერესებულ მშობელთა რიცხვი.
1995 წელს საბავშვო ბაღის მეორე ჯგუფი გაიხსნა, მაგრამ ეს არ იყო საკმარისი. 2006 წელს უცხოელი მეგობრების დახმარებით დასრულდა სკოლის შენობის ერთ—ერთი ფლიგელის მშენებლობა, რომელის ერთი სართული მთლიანად ბაღისთვის იყო გათვალისწინებული და ბაღს კიდევ ორი ჯგუფი დაემატა.
2007 წელის აგვისტოს თვეში, სახელმწიფომ მიიღო კანონი მცირე კონტიგენტიანი საჯარო ბაღების დახურვის შესახებ და რადგან თბილისის თავისუფალი ვალდორფის ბაღი მცირე კონტიგენტიანი სახელმწიფო ბაღი იყო ოფიციალურად დაიხურა. 2007 წლის 29 ოქტომბერს თბილისის რეგიონალური ცენტრის მიერ ბაღი დარეგისტრირდა როგორც არასამეწარმეო, არამომგებიანი იურიდიული პირი ,,აღზრდის ხელოვნება“, რომელიც დღემდე წარმატებით ფუნქიონირებს.
